Pengawa astronomi ba Malaysia
Pengarap Islam ngerembai ngagai Kepulauan Melayu ba pun abad keempat belas.[1]
Syeikh Abdullah Fahim bisi siku ulama Islam Malaysia ngaitka sembah Islam enggau astronomi. Bala ketuai Malaya bisi berunding iya pasal pengawa milih haribulan Hari Merdeka menua Persekutuan Tanah Melayu ba tahun 1957 bepelasarka perati astronomi iya.[1]
Jabatan Pembangunan Islam (JAKIM), ngira jam matahari datai ba baruh sukut lekukan 19° enggau 20° baruh ufuk dikena nentuka jam berengkah sembiang.[1]
Mazlan Othman nyadi pakar astrofizik keterubah di Malaysia, udah bulih PhD iya dalam taun 1981. Mazlan nempa Bagian Pelajar Sains Angkasa (BAKSA) ba Jabatan Menteri Besai Malaysia. BAKSA udah nya nyadi kaban Gerempung Astronomi Antarabansa (IAU). BAKSA udah nya nyadi Ejensi Angkasa Nasional (NSA) ba taun 2002 enggau nyadi Ejensi Angkasa Malaysia (MYSA) ba taun 2019.[1][2]
Dalam taun 1990-an, perintah Malaysia meri kelala program astronomi nanam penyedar mensia mayuh nuju astronomi.[1] Planetarium Nasional ditumbuhka dalam taun 1994. Universiti Malaya udah nya berengkah ba pansik bintang binari, bulan sabit, evolusyen bintang enggau astrofizik nuklear.[1] Dalam taun 2005, Makmal Pansik Kosmologi Radio (RCRL) ditumbuhka ba jabatan fizik Universiti Malaya. Kajian nyengkaum utai ti chelum, dinamik gugus galaksi, jaringan kosmik, pechah radio solar enggau pechah radio ti jampat. Teleskop L-band digaga ba Universiti Pendidikan Sultan Idris enggau kerejasama raban pakar astronomi ari UM. Teleskop L-band ulih ngelala gelumbang radio dalam 1.4 GHz ti dikeluarka atom hidrogen bebas ba dunya raya.[1] RCRL ngepunka pengawa ngaga observatori radioastronomi ke besai agi di Jelebu, Negeri Sembilan ba taun 2019 enggau kerejasama ari menua China.[1] Naka bulan Januari 2024, projek nya benung ba renggat kepenudi tembu.[3] Universiti Malaya mega numbuhka Konsortium Pengemata Observatori Malaysia-Asia Timur (MEASOOC) ba taun ke sama. Iya nganjung nama astronom Malaysia ngambi bagi ba aktiviti Observatori Asia Timur (EAO).[1]
Palan Pengamat Nasional Langkawi (LNO) ditumbuhka dalam taun 2006. Iya nyadi palan latih besai ungkup bala astronomi Malaysia sereta palan kerejasama enggau menua bukai ba pansik astronomi optik. Teleskop optik reflektor Ritchey-Chrétien udah dipasang ba LNO. Iya ngembuan diameter 0.51 meter enggau kamera perengka ke digabung enggau cas (CCD). LNO ngembuan median meda 0.8 arcsecond ba taun 2014 enggau penerang langit ti baruh (magnitud visual 18.6), nya palan ti engkeman endur masang teleskop ke baka nya.[1] LNO ngaga katalog fenomena astronomi khatulistiwa sereta matau objek ti tau mai penusah semak bumi (NEO).[1] Sistem teleskop solar matau aktiviti matahari ba tiga gelombang iya nya cahaya putih, Kalsium K enggau garis alfa Hidrogen. Rangkaian magnetometer bepelasarka tanah mantu matau plasma angin solar maya ribut geomagnetik.[1]
Konvensyen Astronom Global Malaysia keterubah diatur ba taun 2019.[1]
Kereban sanding
[edit | edit bunsu]- ↑ 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 Abidin, Zamri Zainal; Asillam, Mhd Fairos; Koay, Jun Yi (2020-10-14). "Expanding astronomy research in Malaysia". Nature Astronomy (in Inggeris). 4 (12): 1115–1117. doi:10.1038/s41550-020-01230-x. ISSN 2397-3366.
- ↑ Astronomy Education Awareness in Malaysia Dikeluarka ari Universiti Malaya. Diarkib maya ba 5 Jun 2024
- ↑ LAWATAN KSU MOSTI KE PROJEK JOINT SINO-MALAYSIA RESEARCH OF SPACE REMOTE-SENSING AND RADIO ASTRONOMICAL OBSERVATION FOR THE LOW-MIDDLE LATITUDE SPACE WEATHER VARIATION dikeluarka ari Ejensi Angkasa Malaysia. Diarkib maya ba 11 Disember 2024