Parti Asal Bansa Sarawak
Sarawak National Party | |
|---|---|
 | |
| Malay name | Parti Kebangsaan Sarawak |
| Abbreviation | SNAP |
| President | Edmund Stanley Jugol |
| Secretary-General | Frankie Jurem Nyombui |
| Women's Chief | Melissa Anne Inddu |
| Youth Chief | Malachi Dennis Ningkan |
| Founder | Stephen Kalong Ningkan |
| Founded | 10 April 1961 |
| Dissolved | 17 January 2013 |
| Succeeded by | Sarawak Progressive Democratic Party (Pro-BN/GPS faction) New Sarawak National Party |
| Headquarters | Kuching, Malaysia |
| National affiliation | Alliance (1963–66) Barisan Nasional (1976–2004) Pakatan Rakyat (2010–2011) |
| Colours | Blue, maroon, yellow, white, grey |
Parti Asal Bansa Sarawak (Jaku Inggeris: Sarawak National Party; SNAP), nya siti parti politik ti udah nadai agi di Malaysia diatu. Iya nyadi kaban parti Parti Perikatan ari taun 1963 ngagai 1966 sereta kaban gempung Barisan Nasional (BN) ari taun 1976 nyentuk ke dibuai dalam taun 2004.[1] Iya kala bediri minta pilih ba Pengawa Bepilih Besai dalam taun 2004 sereta mega ba pengawa bepilih negeri Sarawak taun 2006 enggau 2011 nyadi parti penyakal.
SNAP nyeretai gempung penyakal perintah besai iya nya Pakatan Rakyat (PR) ari bulan April 2010 nyentukka April 2011.[2][3]
SNAP keterubah iya dibuai ari rejista Opis Pengerejista Gerempung (RoS) kena 5 November 2002[4] lalu ditegika Kort Perintah Besai Malaysia kena 17 Januari 2013 ketegal pemuntan iya mutarka krisis ketuai parti.[5]
Sejarah
[edit | edit bunsu]Taun-taun keterubah
[edit | edit bunsu]SNAP ditumbuhka kena 10 April 1961, parti ketiga ti ditumbuhka pengudah Parti Sa’ati Rayat Sarawak (SUPP) enggau Parti Negara Sarawak (PANAS), muka jalai ngagai penyeretai Dayak ti chakah ukai semina dalam pengawa nyendiaka Sarawak Meredeka, tang mega ngaul diri enggau penuh dalam pengawa politik. Taja pan bisi orang Dayak dalam SUPP enggau PANAS, ti nyadi objektif, tang pengerindu Dayak ngagai dua parti nya sekunder lalu pengawa sida minimum.
Enggau nya bansa Dayak, kelebih agi bansa Iban ngasaika diri nyangka tinggal dalam pengawa ngaga pemutus menua Sarawak ti bisi pengingin deka nyadi menua meredeka, enti sida nadai ngembuan menua kediri empu. Nyadi SNAP udah ditumbuhka ba Betong, Bagi Menua Kedua, lalu penumbuh iya balat disambut majoriti bansa Iban, ti nyadika satu pertiga ari penyampau tubuh Sarawak maya nya. Entara pemungkal parti tu iya nya Stephen Kalong Ningkan, ke nyadi sekretari besai iya, Jonathan Samuel Tinker (Chairman), Edward Howell, Edwin Howell, Ivory Kedit, Mathew Dana Ujai, David Lawrence Usit, Nyipa Julin enggau Lionel Bediman Anak Ketit.
Aum besai keterubah parti tu diatur kena 29 April 1961 ba Munggu Bangkit, Betong, endur parti tu ada. Endur tu udah nyadi indu opis parti tu. Urung 300 iku orang di serata menua Sarawak datai ngulu gempuru nya. Enda lama udah gempuru nya, Ningkan enggau Tinker lalu mansang ngagai Bagi Menua Keterubah, Keempat enggau Kelima bekimpin nyadi kaban lalu berebak enggau nya numbuhka pampang enggau pampang mit. Bisi tiga bulan sida iya baru mulaika diri ngagai Betong. Edward Jeli ke nyeretai parti nya udah nya bekimpin nyadi kaban di Miri seraya ke bukai ngemeratka diri ba Bagi Menua Kedua.
Pengudah berundingka enggau berat, SNAP nerima orang ukai bansa Dayak nyadi kaban parti dalam taun 1963 enggau James Wong Kim Min nyadi bansa China keterubah masuk nyadi kaban. Orang bukai ke udah nya masuk parti nya nyengkaum Wee Hood Teck, Wee Boon Ping enggau Ho Ah Chon. Abang Othman Bin Datuk Abang Haji Moasili nyadi orang Melayu keterubah masuk parti nya.
Penusah ketuai 1983
[edit | edit bunsu]Penusah nya bepun ari bulan Jun 1980 lebuh Dunstan Endawie Enchana ti kala nyadi sapit kepala menteri Sarawak enggau presiden SNAP, nyurutka diri ari pengawa presiden parti nya. Udah nya iya dipadu nyadi Komisyen Tinggi Malaysia ke New Zealand. Dunstan dekaka Daniel Tajem nyilih iya nyadi sapit kepala menteri seraya James Wong nyadi presiden parti nya. Joseph Samuel mega dichalunka kaban parti deka mangku pengawa presiden parti. Dalam aum 25 iku kaban, bala pengari mayuh nyukung Joseph Samuel nyadi sapit kepala menteri Sarawak. Taja pia, Abdul Rahman Ya’kub, ti nyadi kepala menteri Sarawak, ngelaban peneka sida lalu nyiri Daniel Tajem nyadi sapit kepala menteri Sarawak ke baru. Pengawa Abdul Rahman nya udah nyungkak pengeringat bala kaban SNAP laban peneka sida enda dipebasa.[6]
Leo Moggie dipadu nyadi pemangku presiden parti pengudah nya. Dalam bulan Mac 1981, Abdul Rahman badu mangku pengawa nyadi kepala menteri lalu diganti anak menyadi iya Abdul Taib Mahmud. Maya pengawa bepilih parti SNAP dalam bulan Disember 1981, James Wong ngelaban Leo Moggie ke penuduk presiden. Piak Moggie ngasaika SNAP, nyadi parti bepelasarka Dayak, patut betuaika orang Dayak ukai betuaika orang China. Taja pia, raban Wong ngasaika James Wong udah mayuh meri bantu ngagai parti nya alai iya patut diberi peluang ngiring parti. James Wong mujur ngalahka Moggie ba pengawa bepilih nyadi presiden parti nengah majoriti sempit iya nya 15 iti undi. Siku penyukung Leo Moggie, Daniel Tajem mega alah pangku pengawa sapit presiden ngagai penyukung Wong, Edward Jeli. James Wong nguji ngelantangka ati parti nya enggau meri pangku pengawa sapit presiden ngagai Leo Moggie enggau Daniel Tajem. Taja pia, pemeri ti baka nya enda ngemuaska ati raban Moggie.
Parlimen Malaysia udah dibuai kena 29 Mac 1982 dikena meri awak ngagai pengawa bepilih besai taun 1982. James Wong nguji ngeluarka bala penyukung Leo Moggie (Edmund Langgu, Edwin Tangkun, enggau Jonathan Narwin) bediri minta pilih ba pengawa bepilih parlimen. Kepala Menteri Abdul Taib Mahmud mutuska deka meri basa ngagai rintai nama chalun ke dibantaika James Wong. Taja pia, gempung perintah Sarawak Barisan Nasional (BN) betuaika Taib, alah 5 penuduk parlimen ngagai penyakal. SNAP nyadi parti komponen BN maya nya suba. Tiga penuduk alah ngagai Patrick Uren, Edmund Langgu, enggau Edwin Tanggun ke alai semua sida tu kala kaban SNAP bediri minta pilih ngelaban parti SNAP.
Dalam taun 1983, Daniel Tajem ti mengkang nyadi sapit kepala menteri Sarawak udah dibuai ari parti SNAP laban iya ditemu salah nulung bala chalun SNAP ke dulu suba bediri ngelaban chalun rasmi ti dirintaika parti SNAP dalam pengawa bepilih parlimen taun 1982 suba. Taja pia, Daniel Tajem enggai ngelengka pangku pengawa nyadi sapit kepala menteri. Udah nya, dalam bulan Julai 1983, Daniel Tajem enggau Leo Moggie lalu numbuhka parti baru ti diberi nama Parti Bansa Dayak Sarawak (PBDS) dalam tuju deka ngelaban pegai James Wong dalam SNAP. Leo Moggie nyadi presiden PBDS lalu Daniel Tajem nyadi sapit presiden parti nya. PBDS tekala nya minta nyeretai Barisan Nasional (BN) enggau Taib taja pan balat dibantah SNAP. Udah nya PBDS diaku tama Abdul Taib Mahmud dalam BN taja pan balat dibantah Balang Seling ti nyadi Sekretari Besai SNAP. Pemutus ngaku PBDS tama BN mega disambut Mahathir Mohamad, menteri besai Malaysia maya nya.
Pengawa ngemasukka PBDS dalam BN udah ngelemika penuduk SNAP dalam gempung nya laban sekeda penuduk bepilih ulih SNAP tentu deka diberi ngagai PBDS. Pengawa numbuhka parti PBDS nya ngasuh sada nyawa komuniti Dayak bepechah agi ba perintah nengeri Sarawak. Komuniti Dayak endang udah bebagi entara Parti Pesaka Bumiputera Bersatu (PBB) bepelasarka Islam-bumiputera, Parti Asal Bansa Sarawak (SNAP) bepelasarka Dayak, enggau Parti Sa’ati Rayat Sarawak (SUPP) bepelasarka bansa China sebedau tu. Ba pengawa bepilih taun 1983, SNAP deka ngetanka semua 18 iti kerusi ti dipegai sida sebedau tu ba pengawa bepilih nengeri Sarawak taun 1979 lalu enggai alah laban PBDS minta kerusi. Abdul Taib Mahmud, kepala menteri Sarawak maya nya, udah nya mutuska runding deka ngemendarka SNAP bediri minta pilih ngelaban PBDS ba pengawa bepilih nengeri Sarawak taun 1983 ngena lambang parti sida empu nganti lambang sama gempung BN. Ba pengawa bepilih sekali tu, SNAP nyabung chalun ba 18 penuduk lalu PBDS nyabung chalun ba 14 penuduk. Taja pia, SNAP semina mujur menang ba 8 penuduk lalu PBDS menang ba 6 penuduk pengudah pengawa bepilih.
Begulai enggau Pakatan Rakyat
[edit | edit bunsu]Kena 18 April 2010, SNAP enggau rasmi nyadi kaban Pakatan Rakyat (PR), gempung penyakal perintah besai. Taja pia, sebedau pengawa bepilih nengeri Sarawak bulan April 2011, SNAP matak diri ari PR, ketegal enda setuju agih penuduk enggau Parti Keadilan Rakyat (PKR).
Penyerekang
[edit | edit bunsu]SNAP udah dipadahka Opis Pengerejista Gerempung nyadi parti ti udah dibuai ari rejista dulu kena 5 November 2002. Kort Perintah Besai Malaysia udah kena 17 Januari 2013 ngetanka pemutus Opis Pengerejista Gerempung ti madahka SNAP ukai agi parti ti berejista laban udah enda ulih meri bukti ti madahka laya nyadi ketuai dalam parti nya udah diputarka.
SNAP Baru
[edit | edit bunsu]Kena taun 2021, Edmund Stanley Jugol, presiden SNAP ti kepenudi, numbuhka parti baru ti dikumbai SNAP Baru. Parti nya ngumbai diri nyadi penganti SNAP asal, lalu bedau ngerejista diri ngagai RoS. Iya udah madahka sukung ngagai chalun PSB ba pengawa bepilih nengeri Sarawak 2021.[7]
Penyanding
[edit | edit bunsu]- ↑ "SNAP Finally Snaps Off From Pakatan". Bernama. 7 May 2011. Retrieved 17 January 2013.
- ↑ Andy Chua (24 April 2010). "DAP: Sarawak Pakatan formed to promote two-party system". The Star. Retrieved 17 January 2013.
- ↑ Wong, Jack (6 May 2011). "SNAP quits Pakatan". The Star (Malaysia). Archived from the original on 9 May 2011. Retrieved 17 January 2013.
- ↑ "Sarawaks Snap deregistered by ROS". Malaysiakini. 5 November 2002. Retrieved 17 January 2013.
- ↑ "Federal Court upholds ROS' decision to de-register Sarawak National Party". The Star. 17 January 2013. Retrieved 17 January 2013.
- ↑ Hazis, FS (2012). In Domination and Contestation: Muslim Bumiputera Politics in Sarawak. Institute of Southeast Asian Studies. p. 120-124, 127, 128. ISBN 978-981-4311-58-8. Google Book Search. Retrieved 1 February 2015.
- ↑ "SNAP Baru pledges support to PSB – protem president". Borneo Post Online (in Inggeris AS). 24 October 2021. Retrieved 2021-10-24.