Kain Kumbang ari Turin
Kain Kumbang ari Turin (Itali: Sindone di Torino), tauka dikelala enggau nama Kain Kumbang Kudus (Itali: Sacra Sindone), iya nya kain linen ti panjai ti bisi gambar ti samar-samar ba mua enggau belakang lelaki ti nadai begari. Ketegal penerang pasal gambar nya setipak enggau gambar tradisional pasal Jesus ari Nasaret pengudah iya mati nengah chara diregang, kain kumbang nya udah dipebasaka beratus taun, kelebih agi ulih kaban Gerija Katolik, nyadi kain kain Jesus ke alai gambar iya dichelak ngena chara ajih. Gambar mensia ba kain kumbang nya ulih diperatika enggau terang agi dalam negatif gambar burak-putih ari chura sepia asal iya, siti empas ti ditemu Secondo Pia dalam taun 1898, ti ngasilka gambar keterubah kain kafan nya. Gambar negatif tu dikaitka enggau pengarap Katolik ti popular ngagai Mua Kudus Jesus.
Sejarah ke didokumentasyenka pasal kain kumbang nya berengkah ari taun 1354, lebuh iya berengkah dipandangka ba gerija kolegial baru Lirey, sebengkah kampung di utara-tengah Peranchis. Kain kumbang nya dikutuk bishop Troyes, Pierre d’Arcis, nyadi pelesu dalam taun 1389. Kain nya diulih Rumah Savoy dalam taun 1453 lalu udah nya disimpan ba siti chapel di Chambéry, endur iya rusak ketegal angus dalam taun 1532. Dalam taun 1578, raban bansa Savoy mindahka kain kumbang nya ngagai indu nengeri baru sida di Turin, lalu endur nya mengkang kenyau ari nya. Kenyau ari taun 1683, iya udah disimpan ba Chapel Kain Kumbang, ti digaga ke tuju nya ulih arkitek Guarino Guarini lalu ti disambung enggau kededua istana diraja enggau Katedral Turin. Pengempu kafan nya diberi ari Rumah Savoy ngagai Gerija Katolik sepengudah pemati raja Itali ke suba Umberto II dalam taun 1983.
Pakar mikroskopi enggau forensik Walter McCrone tetemuka, bepelasarka peresa iya ba sampel ke diambi dalam taun 1978 ari mua kain kumbang ngena pita lekat, gambar ba kain kumbang nya udah dilukis ngena larut encer pigmen ocher mirah dalam medium gelatin. McCrone mega tetemuka bekau darah ke tampak nya dichat ngena pigmen mirah, mega dalam medium gelatin. Pekara ti ditemu McCrone tu diperebutka bala pemansik bukai, lalu tukuh gambar ba kain kumbang nya majak dipejuraika. Dalam taun 1988, pengawa ngaga timpuh radiokarbon ari tiga buah makmal bibas netapka kain kumbang nya datai ari Zaman Tengah, entara taun 1260 enggau 1390.[1]
Penteba enggau sejarah kain kumbang nya udah nyadika subjek kontroversi ti luas sereta lama dalam litaricha ilmiah enggau surat berita ti tebilang. Taja pan diterima sah ulih bala pakar, tang pengawa ngaga timpuh radiokarbon kain kafan nya majak ngasilka debat mensia mayuh ti signifikan.[2] Bala orang ti ngetanka pengamat kain kumbang nya udah betanya pasal asil radiokarbon, selalu iya bepelasarka sampel ti diuji nya engka udah kamah tauka diambi ari pengawa ngemanahka kain asal. Teori-teori pinggir ti baka tu, ti udah ditulak tebal agi pakar, nyengkaum teori ngemanahka lebuh kurun tengah, teori-teori bio-kontaminasyen enggau teori karbon monoksida. Diatu, Gerija Katolik enda nyukung sereta enda mega nulak pengamat kain kafan nya nyadika relik Jesus.
Kereban sanding
[edit | edit bunsu]- ↑ Taylor RE (2012). "Radiocarbon Dating". In Silberman NA (ed.). The Oxford Companion To Archaeology. Oxford Reference (2nd ed.). Oxford University Press. ISBN 9780199735785.
- ↑ Moorhead, Joanna (2022-04-17). "The $1m challenge: 'If the Turin Shroud is a forgery, show how it was done'". The Observer (in Inggeris British). ISSN 0029-7712. Retrieved 2023-08-06.