Jaku sempama
Jaku sempama iya nya jaku ti tebalan disebut, didinga sereta ditulis ulih orang ari kelia munya. Dalam jaku Melayu, reti sempama iya nya peribahasa sereta dalam jaku Inggeris reti iya idiom.
Latar belakang
[edit | edit bunsu]Jaku sempama endang penemu asal ti manah. Orang jeman kelia ke tajam runding ngumbai sempama nya pemanah runding terebai tauka dalam jaku Inggeris iya dikangau ''potted wisdom'' ti dikelala mega penemu siku mensia ke diulih ari pemandai orang mayuh. Asal sempama ukai semacham. Bisi sempama tu ditengkebangka mensia ke idup begulai dalam mayuh rengat pengidup baka orang ke umang, orang ke kaya, mensia ke tinggi pangkat, bala sengapa orang, sida ke nyadi pengarang penemu ke beberita sereta tebangkar tauka ba raban bansa Iban baka bala sida ke landik bejaku enggau lemambang ke tebilang.Sempama endang diangkat ari gaya idup orang Iban sereta raban bansa ke bukai ke diau besaruk enggau sida tauka ari penemu bansa bukai ke kena dinga enggau kena bacha sida.Nya ke lalu ditunda ari kelia datai ke seharitu.
Sempama tu sigi udah betimbun sereta betambah beratus-ratus tauka beribu-ribu ari taun ke udah.Ari nya, nama penengkebang, pemun tauka pengaga raban sempama nya tauka siti-siti utai nya enda ulih ditemu sereta disidi agi.Mayuh sempama semina ulih dikena ba raban bansa diri empu aja tang mayuh mega sempama ke selubang reti bisi ditemu sereta dikena raban bansa bukai di serata dunya tu.
Pekara ti disempamaka nya nyengkaum pengasai ati mensia, gaya pengidup, pendiau, ulah sida sereta gaya rampa menua enggau utai ke udah nyadi sekalika idup ba kandang nya ke bekelingi pendiau enggau Iban ke dulu kelia enggau semua peturun sida iya nyentuk ke seharitu.
Pemanah
[edit | edit bunsu]Sempama nya pengelandik dikena mensia bejaku, ngasaika pengamat, pemetul kitai ngereja pengawa tauka dikena ngambar sekalika ngayanka jalai ke disadang kitai sereta ngayanka ajar enggau tangkan ke dikena ngurus ulah sereta pendiau mensia ke ngatur pengidup raban bansa diri. Sempama mega nyadi perengka ke dikena orang landik berunding ninggalka penajam penemu diri ngagai anak, uchu enggau ichit sida.Ari asal kelia, mensia rindu agi ngena sempama ke pandak laban nya rumpas agi dikena lebuh berumban.
Mensia bejaku ngena sempama dikena nerangka gaya utai ke enda ulih dipeda ke semina ulih diasaika baka tiup ribut tauka pangka biaubalai enggau utai ti semuti ulih didinga baka auh ujan sereta gu gumbang, depur guntur,letar ngitar,seru nyawa antu,gugu penerebai burung geruna,rikut nyawa kuklir, gu ba langit enggau utai ke bukai ke beribu leman.
Nya alai, pengaya sempama ti dikembuan kitai diatu ulih diayanka ngagai rebak baru kelebih agi pelajar sekondari ngambika sida ngelala kelai bansa Iban awakka enda lus diempa pemansang jeman.Pia mega, kitai ulih nempa rebak baru ti rindu ngena waris pesaka bansa tu ba pengidup.
Kereban sanding
[edit | edit bunsu][1]Jaku' Dalam. ISBN:9789834051389