Gerija Katolik ba Estonia
Gerija Katolik ba Estonia (Estonia: Katoliku kirik Eestis) nya pampang nasional ari Gerija Katolik serata dunya, baruh iring Paus di Rom.[1]
Sejarah pengarap Katolik ba Estonia
[edit | edit bunsu]Ba pun kurun ke-13, Estonia dipegai Perintah Teutonik Jereman maya Perang Regang Livonia lalu enggau nya nyadi siti ari kandang menua kepenudi di Eropah ke di-Kristian. Taja pia, sekeda bukti arkeologi nunjukka pengarap Kristian udah dikelala beratus taun sebedau menua nya dialahka. Bepelasarka utai ke udah ditemu ari arkeologi, baka regang enggau sukut bup ke digaga ari lugam, sekeda endur ba Estonia nya orang Kristian sebedau kurun ke-13.
Selampur menua Estonia dipegai ba taun 1227, nyentuk ngagai tengan kurun ke-16, Estonia dibagi entara pengempu tanah feudal lalu, enggau nya, kandang menua Katolik, taja pan bedau beserakup.
Maya Perang Livonia, Estonia jeman tengah dipegai orang Sweden, keterubah iya nguasa utara Estonia lalu, udah nya, nguasa bagi menua selatan. Perintah Sweden, ari taun 1561–1710, nagang pengarap Katolik ungkup penguntung Gerija Lutheran.
Dalam Perang Utara Besai, Sweden alah Estonia ngagai Rusia, ke merintah menua nya ari taun 1710 ngagai 1918. Imperial Rusia meri hak spesyel ti besai ngagai orang kaya Baltik-Jereman ke diau ba Estonia, nyengkaum pengelepas ngemeranka pengarap Lutheran sida. Maya abad ke-18, orang ke tinggi pangkat ari Katolik Poland lalu udah nya Lithuania berengkah ngena hak tu kediri empu. Misa Katolik keterubah, pengudah lebih seratus taun, diatur kena 18 Januari 1786. Bisi kurang ari 300 iku orang Katolik di Estonia maya nya bepanggai ba Diosis Besai Roman Katolik Mohilev (Estonia nyadi sebagi ari Diosis Besai tu nyentuk ngagai taun 1918). Pengarap Katolik berengkah diangkatka baru. Kena 26 Disember 1845, Gerija Katolik baru Tallinn (kemaya tu Katedral Katolik Tallinn) udah dikuduska, ditangkanka Gerija Katolik baru Tartu (Gerija Konsep Enda Bepenyalah) ba 1899.
Kena taun 1918, lebuh Estonia bulih meredeka, peranak Estonia bisi pengelepas bepengarap ti penuh. Panggah Tuchi ngelala Estonia kena 10 Oktober 1921. Ba taun 1931 Eduard Profittlich, S.J. nyadi administrator apostolik ungkup Gerija Katolik di Estonia. Kena taun 1936 iya dikuduska nyadi bishop Katolik Estonia keterubah kenyau ari reformasyen Lutheran ba abad ke-16. Sebedau Perang Dunya Kedua nyadi, bisi nyauka 5,000 iku orang Katolik ba Estonia. (Tallinn: 2.333, Tartu: 1.073, Narva: ca. 600, Valga: ca. 800).
Kena 1940 Estonia diserang Soviet lalu pengarap ti diatur ditagang. Majoriti ari 5000 iku pengarap Katolik nya sekalika ngelarika diri ari menua nya tauka dijil ba kem jil Soviet. Sida nangkap Bishop Profittlich ke udah nya mati ba rumah jil Soviet di Siberia dalam taun 1942 sepengudah diukum mati nyadi mata-mata Vatican. Pengawa iya beatifikasyen nyadi martir udah dibuka.[2]
Pengudah Serakup Soviet runtuh, Estonia bulih baru meredeka lalu diaku baru Panggah Tuchi kena 28 Ogos 1991. Estonia nerima penemuai paus keterubah iya lebuh Paus John Paul II nemuai ngagai menua nya dalam bulan September 1993.
Pendiau pengarap Katolik kemaya tu di Estonia
[edit | edit bunsu]Penyampau tubuh orang ke megai pengarap Katolik ba Estonia mimit, tang jampat nambah kenyau ari perintah Soviet abis.
Kena taun 2020, pelaba nerangka bisi urung 7,000 orang Katolik ba serata menua tu (0.5% ari penyampau tubuh);[3] tu nyengkaum 31 iku paderi enggau nan ba selampur 10 bengkah parish. Tebal agi sida nya bebansa Estonia tang mega mayuh orang Lithuania enggau Poland. Mayuh ari sida diau ba nengeri besai baka Tallinn, Tartu, enggau Narva. Estonia nadai diosis pengudah taun 1560 tang pengudah taun 1924 serata menua nya numbuhka administrasyen apostolik. Ari taun 2005 ngagai 2024 Administrator Apostolik Estonia ti diau di Tallinn iya nya Bishop Philippe Jourdan. Iya udah nya nyadi bishop ba Diosis Tallinn ke baru ditumbuhka, ke mungkur semua menua Estonia. Dua bengkah parish di Estonia (Tallinn enggau Tartu) ari Gerija Katolik Gerika lalu gawa ke eklisia ke tebal agi bansa Ukraine.[4]
Kereban sanding
[edit | edit bunsu]- ↑ Salo, Vello (2002). "The Catholic Church in Estonia, 1918-2001". The Catholic Historical Review. 88 (2): 281–292. ISSN 0008-8080. JSTOR 25026147.
- ↑ Devin Watkins (16 February 2022). "Estonians renew push for beatification of martyr Archbishop Profittlich". Vatican News.
- ↑ Catholics and Culture website, retrieved 2023-08-08
- ↑ "Ukrainian Greek Catholic Church in Estonia - UKRAINA KREEKA-KATOLIKU KIRIK EESTIS". 13 May 2019.