Adat ngelaluka penatai temuai
Adat ngelaluka penatai temuai iya nya sebengkah adat ti ditunjukka kitai bansa Iban lebuh ngambat penatai bala temuai nyengkaum bala sida YB dataika bala betunggal sereta diri semenua ari menua tauka nengeri bukai. Ba adat tu, lebuh temuai datai ngabang ngagai rumah kitai bansa Iban kelebih agi rumah panjai, kitai bansa Iban bebala mayuh ngambat penatai sida sereta diberi basa diambat ngena Ajat Iban lalu dititihka enggau bunyi Taboh Iban ti betimbal-timbal. Orang ti ngajat ngiring pejalai sida nuju ke penama rumah. Bala temuai lalu diberi Ai Basu Kaki . Ai Basu Kaki nya lalu dituang bala temuai ke tanah seraya macha leka sampi ti dikena minta penyenang, pengelantang, pemujur ba pengidup sereta muai pedara ngambika maya ngabang nadai pedara renga, endang gerai nyamai.Enti sida deka ngirup ai tuak, sida sigi diberi tang enda dipejal nyema sida enggai.
Lebuh udah datai ba penama rumah, bala temuai lalu diulu duduk ba ruai nyema ba rumah panjai tang nyema ba rumah, sida diulu duduk ba bilik besai. Udahnya, kitai bansa Iban endang enda tau enda nunga bala temuai laban nya beguna dikena nyaga pengelantang ati sida sereta ngambika sida berasai nyamai.
Bala temuai mega deka dienahka makai bebala mayuh ti mandangka pemanah ati bekunsi rejeki enggau orang bukai. Sida dilalau begintir ngulihka pemakai seraya ulih berandau enggau orang bukai dikena ngeratka kaul. Maya duduk bekedumuk nya, bala temuai ulih mega betusut enggau bala ke bukai.
Kepenudi, adat ngelaluka penatai temuai tu chukup badas bendar ngagai kitai bansa Iban laban iya mandangka pemereti sereta adat basa kitai sereta ulih nyaga ati bala temuai ke datai.
Malin
[edit | edit bunsu][1] Buku Teks Bahasa Iban Tingkatan 5